2011-1-26

Энэ өдөр Австралийн өдөр буюу бүх нийтийн амралтын өдөр. Энэ өдөр хотод Завьны уралдаан, этгээд сонин автомашины парад гээд олон сонирхолтой арга хэмжээ болдог юм, орой нь солют буудуулна. Өнгөрсөн жил билүү уржнан жил энэ өдөр эндхийн уугуул хэдэн залуучууд Австралийн далбааг шатааж, эсэргүүцлээ илэрхийлээд цагдаад баригдаад байгаа нь зурагтаар гарч байсан шүү. Эндхийн уугуулуудын тоо толгой хагас сая хүрдэггүй. Энэ жил 500000 хүрнэ гэсэн тооцоо байсан шүү, цагаанууд тэднийг хядсаар байгаад нэг мэдсэн чинь устгах шахсан байсан гэсэн. Завтай бол энэ мэт түүхийг нь өөрсдөө уншаарай, сонирхолтой.

Хэтэрхий бүгчим халуун байсан болохоор бид гадагшаа гарсангүй. Хотын төвийн гол замууд хаагддаг, хотын төвд машины паркинг их үнэтэй болохоор хар халуунд машингүй, баахан хүүхдээ чирээд явах чинь хэцүү ажил шүү дээ. Би өдөржин сургууль дээрээ хичээл хийж өнжлөө.

Орой нь П найз гэртээ ирж хоол ид гэж дуудаад, бид очлоо. Би анх удаа л тэднийд очиж байгаа юм. Манай нөхөр тэднийхийг нүүлгэж өгөөд, дараа нь бас бус техникийн туслалцаа үзүүлэх гэж тэднийд очиж байсан юм. П маань нийгмийн мэргэжилтэй, техникээс хол хүн.

Би онгорхой балконых нь үүдэнд сууж байтал гаднаас нисдэг жоом ороод ирлээ. Би ч яахав нөгөө ан гөрөө хийж болохгүй хүн чинь тоосон ч үгүй, жоом миний хөлний хажууд сандал дор байсан юм. Тэгтэл манай бага энд том жоом байна гээд зарлачихсан чинь найзын эхнэр Е орилоод сандал гараад зогчихсон, шингэн хоолойгоор айж байгаагаа илэрхийлээд, гар хөлөө хөөрхөн хөдөлгөөд, үнэхээр эмэгтэй хүн ийм л байдаг байхдаа гэмээр гоё айж байгаа юм чинь. Е 35 размерийн гутал өмсдөг жижигхэн хүүхэн болохоор энэ байдал зохиж байна гэдэг яриа байхгүй. 40 размерийн гутал өмсдөг, бүдүүн дуутай динозавр би тэгээд зогсож байвал нүдний булай болох байхаа, хаха. Эмэгтэй хүн тэгж кайфтай эмэгтэйлэгээр айхаар чинь П болон манай нөхөр 2 эр зоригоо уралдуулан жоомны анд мордож, хүүхнүүдийн нүдэн дээр гавьяа байгуулж, рээтингээ өсгөхөөр тэмүүлэх нь эр хүний уг гээнд нь байдагчлан ялагч болж баатарлаг гавьяа байгуулахаар өрсөлдөөн эхэлнэ бид дээ. П хогийн шүүр, нөхөр таавчиг барьчихсан балетчид шиг өлмий дээрээ гүйлдэн миний 2 талд ирлээ. Даанч 2 баатар маань над руу биш жоом руу хамаг анхаарлаа хандуулж байгаа болохоор одоо би яахав дээ, дотроо Е-д атаархаастай, урдахаа уугаад л сууж байлаа. Тээд хавсарсан хүчээр ан амжилттай өнгөрлөсөн ч Е тайвширч чадахгүй хэсэг боллоо. Үүнийг хараад би өөрийгөө эмэгтэй хүн гэдэгт эргэлзэх гэж байлаа шд. Би чинь нойрмогоороо муусайн жоомнуудыг барьж аваад хана руу шидэж муужруулдаг байхгүй юу. Харин сэрүүндээ жоом хөөгөөд гүйцдэггүй юм. Хорхой шавьж бүү хэл хэвлээр явагч болон аливаа хүйтэн цуст амьтнаас ч айхгүй, тэнэг юм шиг байж байдгийн.  

Ер нь ингэж эгдүүтэй хөөрхөн айж сурнаа гэсэн, хэхэ.